Yin Et

 Kaxëxp ku yikxon ja po’ iany, ku tsäp ejxëm nukë tsuj ja mätsä’, nayëten wä’ts kyaxi’ky ja jaxyëëw, natsjäjëp ja et, ku ja tuu’ nkuyexa’am ka’p ëy kyaxi’ik, nëmp ëjts nënma’any jëtsp, pë ja jëën ëtsënet mpako’mp uk ja tseen mëtë ëëts tsu’uy ntse’xp. Jan tääk jam jëënakëm tsënë, jan teets nyaxy tëjk jëtsp jits ëjts njaak ma’upy wanë, jaak ja mäwäm ëjts, ja’yë ka’ yukëyënyë ja’këxp ku ja pa’an të yëkwejtsjëknë.
Nëm jan teetsy, mäjk natswëtsë ëjts jan tsënapyajt jits putsë njo’xnëukojëm jants näjx ja et, jits ëjts natsëyë ka’ matëy, ja’yë njäwë ku yikxon nyikxëkwejxji’ky, jawanë ojts nka tsapay nukëmts tät pajkwimp päjkjëts jya jäjy, nuko mëj teets nëmë jan teets, yikxon pitsy pën xijy jatën mtumpy, jam mäjk jatën xkatuny, jits jan teets yixon tsäpxi’ky, jajaja, jits nyëm, mpënëm mejts, n’ajtsëp?, jajaja, putsë të jam tääk t’ata’mënyë ja jo’xnëë.
Jits ëjts nwä’kukë, jatikook mpëtsëm tëëk akipy, jits n’atski’y jan këy mëtë ëjts jan äjts ojts tsetsy ku’ ëjts ijts mutsknëm. Tuknäx ëjts njo’xnëë uuky, jits jan tääk mëët jan teets jyants myatsyä’të, ja mext jam jënkupäjkp myauuy, nayëtën ëjts waanë, juun jats ja mext yats ke’eky, ku ja jëën mëjk yats tseexpiky. Näjxp ja et, jits ja jëën wyay, jan teetsy nyiim, pënë net japy ajts tëëk ayëëpy yää, jotmënyë ja kutunk, mëti’ ja mutsk natsiyë wyämujktëp jits yëxpëktëm. Jan tääk nyëm, wan tejnë?, ka’ n’a ejx, mutsnëm atëm yën mutsk mäjk, ka’nëm pyätsy, uk wan tejnë?. Jan teets yatsëy, okëtën, jants ja ëyëmts wënats, jits jan teets xkuujääxy, jits xnëmë, mejts mäjkunk, jawyeen, ntsëky xyik yujp ja atëm jan tsënayën, jëts ku nëxjk mëjënyëp uk ku nëjkx m’ëxpëjkëxnë jatikook yä mwumpetp, nukë namyëkaxë jits ëjts nëjx na kyats kyëxëyë, jats në’p, ëjts yä’ät jan mäjk.

Ja japom njaak matyä’äkt, të ja ntääk mya’oo’knëtë, ja jatëkoojk.

Tsu’ëp ja et, utsya’kyë ja xëëw jyexy, ja joon ja tutk myätëkënyëtë, jan teets jam käm ok’äm ja tsakä tkejy, tukxënaaxy ti jya yu’uy, jatën ja näxwënyët nyaxy  japom japom. Ëxäm lunës ëjts myëtu’uk ojk tën n’ajts jä’xy, säm ja ntääk wyä’ny, tä mejts mijxy mjanty uk turapatnë.
Jëpyë ëjts ëxäm tin yikyuxy, jawänë ja kya maktäxk yä’xy, ku tëm pëtë’ky yikxon ja pujx po’ot ja wyënä’äny, ja’këjxp ku ja yikxon tme’yë, koots kootsnë ja wyënä’äny.
Jan tääk ja tëxnëmë, pëtëknë mäjk mëtë yëm teets jits x’ats ejxp mä’et ja xëëw pitsim jits nayëtën xyikyunëmp ja jä’xy pyo’tk,  jits ku nëjx m’amatskëp ka jam kutëjk mtaxe’këp, kuts jan tääk të yiapätë jits ëjts amëteets të nëjmë, tääk ne’kë amënyë, wan ëjts tjaak mä’yë.  Jan tääk pitsim tëjk akipy jits ëjts yikxon njaak nakyupitsë, ka’ mpawënmay ku täm ja xuxy nyëë tët ninikxy, ja’yë näwë ku ja n’ëjxmääts utsya’kyë xyuxkëtä’ky, jits määp määp mputpëtsëm.
Wanë nyaxy jits jan tääk nyëmkojmë, men mäjk mjo’xnë uuky, nëmë yim teets nayëtën, jaants putsëxëtën, të ëjts ja n’ata’mënyë. Jits nayëtën aexë ja  mtapatsë’m kunet xjäätsëkë’py.
Ja nitsky yikxon wyënä’té, ja uk amënyë y’etë, ja’yë moot mootnë jam ujtsjotp wyëna’any, tomp wanë ja tsë’kë, ja’yë ku wanë, këmëtë ëjts nturapatnë tsim nyëmää ja mupipyë, ja’yë jan anmäjään yikxon pyuts.

Ja japom njaak matsä’kp, të jan tääk myaooknëtë, ja jatikook.